ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រើទុយោទឹកស្រោចទឹកដល់កូនក្មួយក្នុងឱកាសនៃពិធីបុណ្យចូលឆ្នាំខ្មែរ។

សម្ដេចបានសរសេរនៅលើតេឡេក្រាមរបស់សម្ដេច នៅល្ងាចថ្ងៃទី១២ ខែមេសា នេះថា៖ «ស្រោចទឹកឲ្យកូនឲ្យចៅនិងក្មួយៗក្នុងឱកាសចូលឆ្នាំថ្មី។ ច្រើនពេកមានតែប្រើទុយោបាញ់ទេ។ ទឹកផ្តឹល ក៏ទឹក ឯទឹកទុយោ ក៏ទឹកត្រជាក់ដូចគ្នា»។

សម្ដេចបានសរសេរបែបនេះដោយអមជាមួយនឹងវីដេអូមួយដែលសម្ដេចបានប្រើទុយោទឹកបាញ់ស្រោចទៅដល់កូនក្មួយនិងចៅផងដែរ។

គួរឲ្យដឹងដែរថា នៅព្រឹកថ្ងៃទី១២ ខែមេសា ឆ្នាំ២០២៣នេះ សម្ដេចតេជោ ហ៊ុន សែន បានរៀបចំពិធីស្វាគមន៍សិរីសួស្ដីឆ្នាំថ្មីនៅក្នុងភូមិគ្រឹះរបស់សម្ដេចក្នុងក្រុងតាខ្មៅ។

ក្រុមរបាំត្រុដិ របស់ក្រសួងវប្បធម៌ និងវិចិត្រសិល្បៈ មកសម្តែងនៅគេហដ្ឋានផ្ទាល់របស់សម្តេច ដែលរបាំត្រុដិនេះជាសិល្បៈប្រពៃណីដ៏ល្អឯករបស់ខ្មែរ និងដើម្បីបណ្តេញចេញនូវឧបទ្រពចង្រៃក្នុងឆ្នាំចាស់ ផ្លាស់ចូលមកនូវសិរីសួស្តីសម្រាប់ឆ្នាំថ្មី ដែលនឹងមកដល់នៅថ្ងៃទី១៤-១៦ ខែមេសា ឆ្នាំ២០២៣នេះ។

នាថ្ងៃនេះដែរ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងបុត្រា បុត្រី ចៅប្រុស ចៅស្រី ក៏បានប្រារព្ធពិធីកិច្ចមង្គល និមន្តយាង សម្តេចសង្ឃ ៧ព្រះអង្គ ដើម្បីប្រសិទ្ធពរជ័យ កាត់គ្រោះ ចម្លងគ្រោះ ផ្គុំធាតុលើករាសី ដើម្បីចម្រើននូវព្រះជន្ម សូមសិរីសួស្តីជ័យមង្គល អំពីសម្តេចគ្រប់ៗព្រះអង្គ ដើម្បីការពារបញ្ជៀសនូវវិបត្តិ អោយសម្រេចនូវសម្បត្តិគ្រប់យ៉ាង ទទួលយកនូវសិរីសួស្តី ជ័យមង្គល វិបុលសុខ។

ក្នុងឱកាសនេះដែរ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានបួងសួងដល់គុណបុណ្យព្រះរតនត្រ័យ ជាពិសេសទេវតាឆ្នាំថ្មី ឆ្នាំថោះ បញ្ចស័ក ព.ស ២៥៦៦ ព្រះនាម កិមិរាទេវី បុត្រីទី៦ របស់កបិលមហាព្រហ្ម ជួយបីបាច់ថែរក្សា ប្រោះព្រំនូវព្រះសព្ទសាធុការពរជ័យគ្រប់ប្រការដល់ជនរួមជាតិទូទាំងប្រទេស ជួបតែសេចក្តីសុខ សេចក្តីចម្រើន និងសំណាងល្អ ផងដែរ៕